Fund dimri - Nga Vangjush Ziko

Shkriu dhe dëbora e fundit,

nxiu përsëri dheu,

drurët, si robër të zhveshur

pas mbarimit të luftës,

presin t'u presë pranvera

uniformën e blertë

me kopsat e luleve

dhe spaletat e gjetheve,

Bleta doli te pragu i kosheres

nuhat ajrin,

pret sinjalin e aguliçeve

për dasmën e pjalmimit,

Vajzat hoqën shallin

t'u puthë dielli gushën.

Unë ec nëpër dimër timin

me thinjët e pashkrira,

vallë, erdhi pranvera rishtas.

©Vangjush Ziko