Dyshues - Nga Vangjush Ziko

Të gjitha i shoh

(dhe asgjë nuk shoh),

u plakën shqisat e mia

a bota s'është veç hije,

(duket dhe fshihet),

drurët fëshfërijnë,

zogjtë cicërijnë,

një flutur më ulet në sup,

era flokët m'i nduk

me gishtat e saj të padukshëm.

ti lehtë në buzë më puth,

unë të puth në gushë,

prapë nuk më besohet,

prapë bëhem dyshues,

veç plagët në trup,

veç brengat në zemër,

ky i hidhuri thumb

(thumbi i jetës grerëzë),

veç blanat më kujtojnë

(si krateret e vullkaneve)

se ka patur pompej në botë

të bërë shkrumb prej llavëve.