Krijimtari

Deputeti - Tregim nga Vangjush Saro

Vangjush Saro - Vancouver

Pasi mbaroi takimin në Lagje, kandidati për deputet na mori ne, një pjesë të çunave të Lagjes, për drekë; domethënë ne, një pjesë e çunave (të Lagjes) e çuam atë dhe shoferin e tij për drekë.

Ai kishte qenë deputet edhe në legjislaturën e shkuar; tash po luftonte të kthehej sërish në Parlament. Ia thoshin emrin Dilaver, por shkurt e thërrisnin Lake. Shoferi i tij ishte një birbo, që herë pas here komentonte duke zbardhur dhëmbët: “Shefi ashtu.” “Shefi kështu.” Ose e kundërta.

Z. Dilaver të jepte përshtypjen se nuk kishte ngrënë mëngjes; pastaj, e mori pak me rrëmbim edhe të pirët, dhe filloi të fliste ca si shumë. Ç’ishte më e keqja, ai dukej i shpërqendruar, kërcente nga njëra temë në tjetrën dhe çdo fjalë a term e përdorte njëherë në origjinal dhe herën tjetër duke thënë inicialet ose duke vënë në dukje simbolet…

-Kripën, - tha dikur ai - unë përpiqem ta mënjanoj. Kripa, NACL, më bën dëm për tensionin. E Kape?

Se çfarë duhej të kapnim, ecë e gjeje. Dhe pas një copë here:

-Kemi disa pengesa nga Koalicioni për Mbrojtjen e Vlerave Kulturore, KMVK, që do të tejkalohen me kohë. Ne ndërhymë fort. Komisioni i Kuvendit për Trashëgiminë, KKT, s’e luante fare menderen…

Çunat e Lagjes dëgjonin gojëhapur. Unë isha çun i ri (në atë lagje). U habita pak me heshtjen e tyre dhe, po ashtu, me zhdërvjelltësinë e deputetit. Për më tej, nuk po e “kapja” dot thelbin e bisedës dhe, ca më pak, këtë punën e inicialeve dhe të simboleve. Por nuk e bëra veten. Deputet tjetri; do t’i japë takimit një lloj fryme e intelektualizmi. Ani, fundja biseda nuk po shkonte edhe aq keq. Dilaveri e drejtonte atë në hullitë që duhej. Ai qe vërtet një muhabetçi i mbaruar. 

-Ja, le të marrim Luftën Nacional-Çlirimtare, - tha pas një çikë. - Kundërshtarët tanë e nënvlerësojnë atë. Lufta Nacional-Çlirimtare, VFLP, ajo i solli popullit lirinë. 29 Nëntor 44. E kape?

E, këtë herë e kishim “kapur” disi. Në fakt, gjëra të tilla ne nuk i dinim mirë; mbase edhe i dinim, i kishim dëgjuar, por se po na i kujtonte deputeti, s’kish ndonjë të keqe. Mirëpo, nga lufta ai shkoi te municionet, ashtu erdhi biseda:

-Kisha një revolver, TT 12 741, epo që ta dini ju, e shkreha njëherë, në një miting… Ja, e them hapur unë, jam pak nevrik.

Nevriku Lake po tregonte shenja që ish bërë dhogë tashmë.

-Ne do luftojmë çdo abuzim, - e ngriti ai zërin dhe gotën. - Ndërrova unë makinën? Më parë kisha një benz TR/A 24 52, tani mora këtë Audi 5 TR/ A 279. E kape? Po u rri goja njerëzve! Pse e ndërroi makinën ky… Se ky kishte atë benzin TR/A 24 52 ashtu 25, jo mirë e kisha 52… po ky si e mori këtë makinën tjetër Audi 5 299 jo 289, domethënë 279… ky e di më mirë. - tregoi me dorë shoferin, që gjithashtu ishte bërë karroqe. - I thanë të dashurës sime A. K., që ky ashtu dhe kështu… Për mua de, e kape?

Uau! Iku deputeti. Po hynte në tema intime.

-Se e dashura ime kishte një floktore. E kape? Këtu te “Myslym Shyri”, 25 810.  Ashtu. Këto lëndët e para ia siguroja unë; tani, pak tregti do ta bëjmë. E kape? Epo ishte njëlloj kremi, dale si e kishte, hë, Top notch E J 18, viti i prodhimit 4014, jo 2014, jo e tetëmbëdhjetë… 

Pas një copë here, ne çunat e Lagjes, e morëm kandidatin për krahësh e për këmbësh dhe e futëm në makinë. Ai vazhdonte të mbante fjalim e t’i shoqëronte fjalët dhe termat me iniciale dhe simbole:

-I thashë Kryetarit, kalojeni Ministrinë e Shkencës dhe të Arsimit MSHA, jo të Arsimit dhe të Shkencës, MASH, në godinën ngjitur, Rruga e Durrësit 90 12 dhe këtu bëjmë ndonjë biznes… T’ëmën, sa paskemi ngrënë! Sepse, një gjë është e qartë: Kur ti përdor shumë kripën, NACL, apo jo…

Obobo, filloi nga e para! Se tani vinte radha për VFLP… Ndërkaq, shoferi i tij, shkërdhata, vazhdonte të zbardhte dhëmbët: “Shefi ashtu…” “Shefi, kështu…”

Zot! Po ne, çfarë po bënim ne? Më erdhi shumë keq për çunat e Lagjes. Edhe për veten doemos. “Por do përmiret… përmirë… sohet ele furnizimi i popullatës me ujë, H2O.” Ndjeva nëpër mollëzat e faqeve një lot. Më erdhi shumë keq…

©Vangjush Saro