Në fillim - Nga Vangjush Ziko

Në fillim

hedh gërmën në letër

si në fletën e abetares,

me dorën, që dridhet,

pastaj më prangosin vargjet.

Në fillim

kanarina çuket melin

në kafaz të florinjtë,

pastaj robina

vajton lirinë.

 

Në fillim

lulja ia hap gjoksin flladit

ta ledhatojë,

pastaj trishtohet,

se ia vodhi aromën.

Në fillim

jemi naivë,

në mos, të magjepsur,

fajin e kanë çapkënllëqet,

pastaj thinjët

me mendimet e plagosura pleksur.

©Flasshqip.ca