Biblioteka e panjës - Vangjush Ziko

U lodha me librat

prej letre dhe elektronike,

dola në ballkon,

era shfleton fletët e panjës

sikur më shfleton Iliadën

a Luftën e Paqen

faqe më faqe,

gjetheve yjet dhe dielli

poemat kanë shkruar,

zogjtë - këngët e tyre,

fluturat - vizatimet abstrakte,

vesa e mëngjesit

lirikat e hënës stolis.

Çdo pranverë blerojnë

gjetheve sërish

best sellere-t kozmike,

fragmente pergamenësh

me enigma të arta antike

vjeshta ronit…