Burgu im - Nga Vangjush Ziko

Jetoj në ekranin e laptopit

ku fjalët

si në përrallë më mbijnë,

Psherëtijnë dhimbjet e pikëçuditëseve,

Enigmat e jetës,

gati për shpërthim,

varen në çengel të pikëpyetjeve,

Plasin papritur,

më plagosin brengat e tyre.

Muza, mëndesha ime,

pas vargjeve-kangjella

të burgut tim fletëbardhë,

më vë mbi blanat

balsamin e frymëzimit

dhe më bën të lumtur.

©Vangjush Ziko