Idiot… - Nga Artan Gjyzel Hasani

…do t’i gjesh të ngjajshmit e tu kudo që të jesh

si i mënçuri të mënçurin

maskarai maskarain

do t’i gjesh dhe do të ndjesh që i vetëm nuk je

as aty ku rron

as në të tjera vënde

kur të të japin në dorë mikrofonin

për t’i dëshmuar me ngadhënjim botës

mungesën e nevojshme të truve

dhe ekzistencën tënde…

do t’i gjesh të ngjajshmit e tu

të lumturit e të mjerët

do t’i njohësh nga sytë pa vështrime

do të të njohin nga zëri pa tinguj

gojëhapur e symbyllur

gjithnjë do të thithni

ajrin që nxjerrin të tjerët…

ti nuk ke asnjë mëdyshje për askënd e asgjë

ti je pjellë e të vërtetës kolektive

e ke zgjidhur që në lindje dilemën e madhe

më mirë një i mençur i dëshpëruar

apo një idiot i lumtur…

ndaj përkëdhele fatin

gëzo dhe harro

jo vetëm çfarë dije dikur

por edhe gjërat që nuk t’i mësuan dot kurrë

ata që nuk të ngjanin…

(nga vellimi poetik "IDIOTICUS", 2022)

©artangjyzelhasani