Zgjedhjet, një PPP më tepër - Nga Ilir Gjini

Në prag të zgjedhjeve të para pluraliste në Shqipërinë e vitit 1991, K.B. një i burgosur politik i sapo liruar nga burgu, erdhi tepër i shqetësuar në selinë e Partisë të sapo krijuar Demokratike dhe me një zë të mekur tha: Edhe mishin të ma presin unë nuk do votoj për Partinë e Punës. Po, atyre të shtëpisë u thashë të votonin Partinë e Punës, që mos vuajnë pasojat si unë. Po pse e pyetëm? - Kanë vënë kamera në dhomat e fshehta. Ma tha operativi i zonës.

Po sot 30 vite pas rrëzimit të komunizmit, a janë të lirë për të shprehur vullnetin e tyre me votë shqiptarët? Eksperienca e 30 viteve asnjëherë nuk ka lejuar që një parti të qeverisë më teper se dy mandate. Por, asnjëherë në historinë e pakët pluraliste nuk kemi patur një situatë të tillë. Opozita asnjëherë nuk ka qenë në pozita kaq vunerabël karshi pushtetit.

Parlamenti i sotëm është një kopje e llustruar e Kuvendit Popullor të Haxhi Lleshit ku pa asnjë hezitim mund të votohen edhe ligje të “leshit”, për ta çuar për skrap opozitën e vërtetë. Asnjëherë më parë ligji zgjedhor nuk është votuar vetëm me kartonat e mazhorancës.

Media që në kushtet e pandemisë do të luajë një rol të madh në përcjelljen e mesazheve dhe programit te kandidatëve e partive garuese, është shndërruar në një megafon të Kryeministrit. Televizionet kombëtare që kanë edhe numrin më të lartë të shikuesve, ngjajnë me ERTV-në e Ramës si të ishin binjakë. Madje në Tv-në që mbahet si më i madhi në vend, opozita nuk figuron fare. Lajmet hapen dhe mbyllen me bëmat e Kryeministrit dhe opozita përmendet vetëm kur ka ndonjë lajm “dorëheqje” nga Vlora.

Kulmi i propagandës u shfaq teksa drejtuesja e emisionit politik publikoi një video që i erdhi nga një i panjohur, ku gjoja në një takim të mazhorancës nuk po respektoheshin kushtet e pandemisë. Në fakt thelbi ishte te disa gra LSI-te në Berat, që largoheshin nga partia për tu bashkuar me PS-në.

Policia e shtetit është shndërruar në taksidare e “Rilindjes” që nuk heziton të gjobisë opozitën për ndonjë anëtar më tepër në takime, po asnjëherë qeverinë. Edhe kur KQZ-ja gjobit Veliajn, gjoba anullohet më pas. Kanë kaluar disa muaj nga arrestimi i aktivistëve të teatrit dhe gjakosja brenda mbienteve të policisë e Donald Martinit. Ka ndonjë polic të proceduar penalisht?

Figurat e Najadës dhe Luljetës po përdoren si detergjent për të shpëlarë gjyhahet e keqqeverisjes. Po a mundet që portreti i Najadës të mbulojë zullumet e PPP-ve që janë shndërruar në “Tiret” zhvatëse të xhepave të shqiptarëve? A mundet që portreti i Luljetës, të mbulojë kullat gërvishtëse që po mbulojnë edhe Kullën e sahatit dhe rrënojat vajtonjëse të Teatrit Kombëtar? A mundet që 7x7 = 42 e Lulit, të mbulojë 7x7 = 8.000.000 euro në xhepat e Vilmës edhe kur nuk bën fare analiza?

Në mungesë të një bilanci të premtimeve me realizimet, Kryeministri po përpiqet të “mbulojë diellin me shoshë” përmes propagandës dhe bullizmit të kundërshtarit. Ai më tepër ngjan me personazhin e Gogolit Pavël Çiçikov që mblidhte shpirtra të vdekur që nuk qenë regjistruar ende për të tillë, në Rusinë e shekullit të 19-të!

Zgjedhjet e 25 Prillit me shumë gjasa do të jënë një PPP më tepër në krushqinë e pushtetit të parasë së oligarkëve dhe favoreve të pushtetit. Në prag të zgjedhjeve të 2005 (punoja për Top-Channel) u “zdrugova” nga Policia e Shtetit teksa raportoja përleshjen e banorëve të Kakomesë me policinë. Një përfaqësues hollandez i misionit të KE-së, më pyeti për ngjarjen si dhe mendimin tim për përmirësimin e situatës konfiktuale. I bëni presion politikanëve të të dy krahëve të ndryshojnë “Kodin e Punës”, i thashë. Pse? Nëse gjykatat për pushimin pa të drejtë nga puna do kërkonin jo vetëm pagat e munguara, por edhe kthimin në vendin e punës, do t’u hiqnin partive një pjesë të konsiderueshme të militantëve që “joshen” prej tyre vetëm për një vend pune.

Për të përshkruar situatën e sotme elektorale do nxjerr përsëri nga “arkivi” një ngjarje reale të Janarit 1991. Mjeku onkolog Bert Asqeri erdhi me vonesë në një mbledhje që komisioni nismëtar i degës së PD-së bënte në shtëpinë e Dino Çiços, pasi ende nuk kishte seli. Pse vjen me vonesë Berti? - pyeti kryetar Xhelua. Berti që shquhej për humor u përgjigj: Situata jashtë është shumë e tensionuar. Grupe të besnikëve të Enverit janë gati të na shqyejnë së gjalli. Unë nuk do tregoj asgjë për ju edhe po të më torturojnë… por, po më vunë vezët e ziera në sqetulla, i thashë të gjitha. Këtë torturë nuk e duroj dot.

Në fakt sot vezët e ziera i kanë në dorë oligarkët që mund të na i servirin me salcë floriri nga ajo e Nusretit, që t’i japim votën pushtetit. Pa harruar këtu Çyrbet dhe  Rrahjat, që dyshohen se i bien çyrbes me botën e errët të krimit…

©Ilir Gjini