Letrat si ilaç për kryeministrin e sëmurë - Nga Jeta Dedja
Gazeta e Shoqatës Mjekësore Amerikane (vol 281, nr 14), para disa vitesh publikoi një studim të Joshua Smyth mbi efektet e të shkruarit në gjendjen fizike tek pacientët që vuanin nga Astma dhe Artriti reumatik.
107 pacientë që morën pjesë në këtë studim, shkruan 3 ditë rresht nga një letër. 70 prej tyre shkruan mbi ngjarje stresuese të jetës dhe të tjerët për çështje neutrale.
Pas ushtrimit të të shkruarit, u vu re që pacientët që shkruan për ngjarjet stresante patën përmirësime në shëndetin e tyre. Kështu që studiuesit nxorën konkluzionin se procesi i të shkruarit mbi çështjet shqetësuese ndihmon në shërimin e pacientit.
Ky studim më kujtoi kryeministrin e Shqipërisë Edi Rama, i cili ndryshe nga pacientët e Smithit ka shkruar më tepër se 3 letra. Sigurisht që në letrat e tij nuk ka folur për çështje neutrale e as se çfarë do të hajë për drekë, por ka shkruar për një ngjarje madhore siç është kriza politike e vendit, protestat e opozitës që në këtë rast mund të cilësohen ngjarje traumatike, stresuese, ngacmuese, gjumëprishëse të kryeministrit të vendit.
Përmes gjuhës së “dashurisë” dhe ironisë së shplarë prej viteve të konsumit në jetën publike, Edi Rama i drejtohet Lulzim Bashës si Tatiana e përvëluar Onieginit. Vetëm se Tatiana u mjaftua me një letër, ndërsa përdëllimtari ynë, jo për Lulzimin, por për atdheun nuk po ndalet.
Më duhet t’i them kryeministrit se të shkruarit kompulsiv i letrave për të njëjtën temë (6 copë deri më sot) në vend që t’i sjellë benefitet që studiuesit prej 10 vitesh i kanë vërtetuar, mund t’i shkaktojë dëme në shëndetin fizik si dhe atë mendor, sidomos nëse këto letra Kryeministri i shkruan vetëm në zyrën e tij, pa konsulencë psikologjike ose nën këshillat e dobëta të zanatçinjve të tepsisë.
Letrat e kryeministrit shqiptar janë kthyer në objekt talljeje mes qytetarëve që guxojnë të flasin. Ata numërojnë dhe presin ushtrimin e radhës të terapisë së të shkruarit që kryeministri i vendit me krenari e publikon duke i treguar gjithë botës se është rëndë, po shumë rëndë…
*Më poshtë lexoni letrën e padërguar të Edi Ramës për Lulëzim Bashën sipas modelit pushkinian.
I dashur Luli,
Po marr guximin që t’ju shkruaj
Për të gjashtën herë, dhe pa ndalim
Aman o shok, ç’kërkoni më,
pushtetin doni a veç shpirtin tim?
E di, se është e drejta juaj
Të protestoni e të më tallni papushim
Po ju e shihni sa po vuaj për këtë vënd
Duroni pak sa ta mëkëmb
Më parë desha të rri qetë,
Të qepja çitjane veç doja
Por populli im më thërret
dhe unë nuk i lë me gishtin te goja
Ah Luli, sërish të vish pranë meje ëndërroj
Që t’ju dëgjoj e me ju të kuvendoj,
T’ju them një fjalë dhe pastaj
Në media dil ti, unë nuk të mbaj,
Veç gjer sa t’vish e t’më takosh
Bëj shopping dhe ndërro kravatë
provo para pasqyrës si do më përqafosh
se krahët e mi do t’i hap kanat më kanat
Me ty në opozitë është kaq fat,
Kaq shumë turbullim veç ti më jep
Se ti Luli im
je afsh i shpirtit tim në pushtet
Një miku tjetër mund t’i bëhesha mik
Dhe shok besnik sot e përjetë
Por, jo…jo askujt në jetë
Nuk do t’i falja kaq dashuri!
Por këto protestat po me çmendin
Më lodhe mua dhe policinë
Njerëz plot në rrugë rendin
A je ti ende engjëlli im ??
Ma hiq tani këtë dyshim
Mbylli protestat dhe eja tek unë
Për zemrën time mos ji një zhgënjim
Më qan me lot shpirt i ngratë
E mbrojtje kërkoj e ulëras
Lexoje dhe letrën e gjashtë
Aman se ndihem vetëm, s’kam me kë flas
Askush nuk mund të më kuptojë
Mendja fillon të më lëshojë
Në heshtje duhet të humbas
Letrën e shtatë nuk po e plas
Mbarova! S’mund ta rilexoj…
Po vdes nga frika i turpëruar
Po nderit tuaj i besoj
Me plot guxim duke shpresuar
I Yti Edi Rama
(P.S ) Bazuar në vija të përgjithshme në letrën e famshme të Tatianës drejtuar Onieginit sipas romanit në vargje "Eugjen Onjegini" nga Aleksandër Pushkin.
Jeta Dedja, Maj 2019
©FlasShqip