Vota për ndryshime në Kosovë forcon miqësinë me SHBA - Nga Agim Aliçkaj

 Agim Aliçkaj

Presidentët amerikan nuk deklarohen, por Biden do të preferonte Zonjën Osmani dhe Zotin Kurti në qeverisje të Kosovës

Letra e Presidentit Biden

Letra e Presidentit amerikan Biden dërguar presidentit serb Vuçiç e manifeston politikën reale dhe të drejtë amerikane në interes të paqes në Ballkan. Kjo letër i shuan shpresat e Serbisë dhe Rusisë për dalje në det nëpërmjet tokave shqiptare. E hedh “Mini-Shengenin” e armiqve dhe tradhëtarëve të kombit shqiptar në liqenin “Trump”.

Të gjithë ata që kanë kontaktuar, punuar dhe kanë nderin ta njohin personalisht presidentin Biden, e dinë qëndrimin e tij parimor për çështjen e Kosovës. Ishte joserioze deklarata e kryeministrit në detyrë se “ju kam paralajmëruar” për Biden. Edhe zogjtë e malit e dinë se ai ishte pro-Trump, ndërsa lideri i Vetëvendosjes i dha përkrahje publike fushatës zgjedhore të presidentit Biden. Edhe pse një president amerikan dhe administrata e tij nuk dalin publikisht në përkrahje të liderëve të një shteti tjetër para zgjedhjeve nacionale, është e qartë se ai do të preferonte zonjën Osmani dhe zotin Kurti në qeverisje të Kosovës.  

Amerika dhe presidenti Biden nuk kan kohë të merren me Kosovën në pafundësi. Presin me të drejtë që ne vetë ta ndërtojmë shtetin tonë. Politikanët e korruptuar nuk i duhen askujt. Nuk zhvillohet dhe forcohet miqësia me asnjë shtet në botë duke e copëtuar dhe shitur shtetin tënd. Forcimi dhe zhvillimi i shtetit, mbrojtja e sovranitetit dhe ruajtja e integritetit teritorial është në interes të Kosovës, Evropës dhe Amerikës. Serbia nuk bën të lejohet të vazhdojë të sillet si viktimë. Duhet të paguajë dëmet e luftës, t’i kthejë të pagjeturit, t’i dorëzojë kriminelët e luftës të cilët sillen lirisht kudo, t’i pranojë krimet dhe të kërkojë falje për to.

Nuk ka kompromis, nuk ka ndarje, nuk ka asociacione dhe pikë. Të drejtat e serbëve në Kosovë duhet barazuar me të drejtat e shqiptarëve në Serbi. Askush nuk mund ta detyrojë popullin e Kosovës për ta humbur lirinë. Kosova është fëmijë i Amerikës e thoshte edhe vetë shovenisti Vuçiç. I shkreti, mendonte fëmijë i Grenellit për të bërë çfarë të dojë me të, por i doli ndryshe. Amerika, është shumë më shumë se një ambasador ose politikan i saj arrogant. Është vendi i demokracisë dhe drejtësisë botërore.

Shtypja e votes së Mërgatës

Në shtetet me demokraci të përparuar siç është Amerika, shtypja e votës konsiderohet problem shumë serioz antidemokratik. Vota është e drejtë e shenjtë e cila nuk mund të cenohet. Në Kosovë, shtypjen e votës po e bën hapur dhe pa pikë turpi vetë KQZ-ja, institucioni më i lartë i cili e ka detyrë të kujdeset për mbarëvajtjen e zgjedhjeve. Mërgimtarët jan vënë në shënjestër të KQZ-së sepse ata e kanë bërë të qartë se do të votojnë për ndryshime. Më shumë se gjysma e aplikacioneve të dërguara për regjistrim as që janë hapur, pra nuk janë konsideruar fare. Krijohet përshtypja se ky ishte regjistrim për të luajtur loto, ku disa fitojnë dhe shumica humbin.

Këtë e ka përjetuar gati çdo familje, shumë nuk janë marrë në telefon fare, nuk figurojnë në listën e të regjistruarve dhe nuk kanë marrë kurrëfarë arsyetimi për refuzim të tyre. Nga gjashtë anëtarë të familjes sime, të cilët i plotësojnë kushtet për regjistrim, vetëm një është telefonuar dhe vetëm dy janë regjistruar. Në ankesën tone dërguar PZAP dhe GJK, nuk përgjigjet askush. Megjithate ne votuam, i dërguam votat me postë të shpejtë DHL në dy zarfa, njëri me dy vota të shtetasve të regjistruar, tjetri me katër vota të shtetasve të mohuar. Ne të diskriminuarit kërkojmë nga KQZ që votat tona të numërohen, dokumentet që dëshmojnë kualifikimin tonë janë në zarf. KQZ mund ta mohojë të drejtën tonë për të votuar, por nuk mund të na marrë lirinë e fjalës. 

Zgjedhjet e 14 Shkurtit, shpresë për ndryshime

Fjala e jonë, zëri i ynë i bashkohet zërit të fuqishëm të popullit të Kosovës. Kërkojmë ndryshime në qeverisje. Besojmë se populli i Kosovës me 14 Shkurt, do të votojë edhe për neve që mund të mbetemi me votë të shtypur, do të votojë për ndryshime, do të votojë për Vetëvendosje dhe Guxo. Krejt dhe Drejt. Zonja Vjosa Osmani është pasardhëse e denjë e presidentit legjendar Ibrahim Rugova. Ajo dhe Zoti Albin Kurti janë të drejtë, të vendosur, të pakorruptuar dhe të aftë për ta udhëhequr shtetin.

Duhet shpresuar se votuesit që preferojnë kandidatë të partive tjera do të votojnë për kuadro të reja, të aftë, të shkolluar e të edukuar. Për ata që nuk morën pjesë në korrupsion dhe shkatërrimin e shtetit të Kosovës. Për ata që interesin shtetëror dhe kombëtar e qesin para interest individual, klanor dhe partiak. Detyra e tyre është e trefishtë, ta shpëtojnë partinë, të bëhen opozitë konstruktive dhe të ndihmojnë në shpëtimin dhe forcimin e shtetit.

Sidomos nuk duhen votuar ata, që për interesa personale, bashkëpunuan dhe iu nënshtruan rrënuesit të demokracisë së Kosovës, ish-ambasadorit amerikan pro-serb Richard Grenell. Ai dhe ish-presidenti Trump ishin shpresa e fundit e shovenistit Vuçiç për ta ndarë dhe shkatërruar Republikën e Kosovës. Veprimet e tyre ishin në shërbim të Serbisë, kundër interesave shqiptare dhe amerikane. Politikanët e Kosovës duhet të kuptojnë se detyrë e tyre është për t’i mbrojtur interesat shtetërore dhe kombëtare, jo për t’iu nënshtruar forcave të jashtme kur ato punojnë në interes të armikut. Vetëm populli i Kosovës ka të drejtë të vendosë kujt ia beson qeverisjen.

Përpjekja klasës së dështuar për të mbetur në pushtet me çdo kusht, pa kërkuar falje për keqbërjet 21 vjeçare, pa i ofuar popullit programe reale për ndryshim, veç me sharje, fyerje dhe akuza imagjinare të oponentëve politikë, është dëshpëruese. Duhet patur kujdes dhe syçeltësi në moslejuarjen e shkaktimit të ekseseve të mundëshme me qëllim të dëmtimit të proçesit zgjedhor, ngado që vijnë ato. 

Pas dështimit në Amerikë, serbët i kanë ndryshuar metodat e veprimit. Janë orientuar nga Evropa, aty ku Rusia dhe pesë shtete që nuk e njohin Kosovën kanë influencë të madhe. Lajçak dhe Borrell janë pro-serbë dhe më të këqinj se Grenell por nuk e kan arrogancën dhe fuqinë që e kishte ai. Kjo e bën edhe më të domosdoshme lidhjen e Kosovës me Amerikën. Vota për ndryshime e forcon miqësinë me Amerikën. Kosova dhe trojet shqiptare, me mërgatën patriotike, të fortë materialisht dhe të ditur, janë në gjendje ta mundin shtetin mesjetar serb si në vitet 90-të. E drejta është me ne, fitorja është e jona dhe varet nga neQ

*Autori është anëtar i Bordit Ekzekutiv të Ligës Qytetare Shqiptaro-Amerikane dhe i Këshillit të Vatrës