Kolumnist

Për Teatrin, pas Gjykatës Kushtetuese radhën e ka SPAK - Nga Ylli Manjani

Vendimi i Gjykatës Kushtetuese, me aq sa është njoftuar, është një fitore e qytetarisë mbi barbarinë. Është triumf i Kushtetutës mbi halldupërinë politike moniste që i punoi qindin këtij vendi, që nga dita kur Gjykata Kushtetuese kyçi derën në emër të pisllëk-reformës në drejtësi. Shkeljet ishin aq evidente sa nuk ka qokë-emërim që i mbulon!

Do pres sa të zbardhet i plotë edhe ky vendim për të kuptuar më mirë arsyetimin, por nuk mund të mos shpreh respekt për kurajon dhe qytetarinë e trupës gjyqësore, e cila ndonëse e mangët në përbërje, po jep mesazhe të qarta drejt vendosjes së rendit kushtetues. Njëkohësisht respekt për Presidentin e Republikës, stafin e juristëve aty, për vëmendjen dhe punën e palodhur, pavarësisht presionit barbar të pushtetit monist.

Dhe pa dyshim respekt për Aleancën për Mbrojtjen e Teatrit, që mbajti gjallë kandilin e demokracisë dhe qytetarisë së trullosur nga pushteti joshës! Ata qytetarë që u rrahën e u dhunuan nga policia me këtë rast janë themeli i qytetarisë dhe meritojnë veç respekt dhe përulësi.

Tani vërtet radhën e ka SPAK. Ka një seri kallëzimesh aty. Shkeljet janë të rënda dhe të kryera nga zyrtarë të lartë, ndoshta dhe në bashkëpunim…

Disa miq, bazuar në një deklaratë “fitoreje” të Erion Velisë, më kërkuan mendim më të detajuar për vendimin e sotëm të Gjykatës Kushtetuese.

Nuk kam ndërmend të sqaroj deliret e Erion Velisë, as të pastroj zhulin mediatik që hedh ai për të ngatërruar opinionin publik me copëza fjalish që shkëputen nga një vendim ende i cunguar i Gjykatës.

Të gjithë ata që kërkojnë sqarim në lidhje me pikën 4 të atij vendimi, i ftoj të kuptojnë se:

1. Duhet të presim arsyetimin për të kuptuar plotësisht logjikën e vendimit, ku përfshihet edhe ajo pika 4.  Kjo do ishte më korrekte.

2. Megjithatë pika 4 thotë se Gjykata ka rrëzuar kërkesën, pra nuk e ka gjykuar pjesën e kushtetutshmërisë së vendimit të Këshillit Bashkiak. Ndoshta nuk ka gjetur arsye kushtetuese. Ndoshta kjo çështje nuk ishte kompencë e Gjykatës Kushtetetuese (unë besoj se kjo është arsyeja). Por kjo nuk do të thotë se vendimi i marre nga ai këshill është i ligjshëm.

3. Debati mbi ligjshmërinë e një vendimi këshilli bëhet gjykatën Administrative, pse jo edhe në Gjykatën Penale, por jo në atë Kushtetuese.

4. Por gjykata Kushtetuese ka thënë se Ligji për ndërtimin e Teatrit me PPP, transferimi i godinës në bashki janë antikushtetuese. Pra kalimi i Teatrit te Bashkia është nul. Dhe Këshilli Bashkiak dhe Erioni ndjehen të “ligjshëm” se kanë shëmbur një godinë që nuk u takonte atyre për ta bërë?! Nëse këtë e quan fitore, e gëzoftë! Por pas qafe e ka.

5. Praktikisht, Erioni në bazë të këtij vendimi duhet të kthejë mbrapsht me inventar të rregullt godinën e Teatrit. Nëse këtë godinë nuk e ka, do t’i duhet ta gjejë ose ta paguajë tullë për tullë. Ka vetëm një shanc t’i shpëtojë kësaj përgjegjësie, nëse dikush në qeveri ia firmos marrjen në dorëzim pa inventar. Në këtë rast ky që firmos merr përgjegjësinë e Erionit.

6. Gjykata i ka thënë Erionit që atë projektin që miratoi fët e fët në KKT, t’i pijë lëngun. Nëse nuk mjafton kaq, për të kuptuar se “fitorja” e Erionit është si hapja e negociatave të padronit të tij, nuk e di ç’të them më shumë.

Ju lutem përpiquni të kuptoni se Gjykata Kushtetuese nuk ka detyra as të shembë e as të ndërtojë godina; as të fusë njeri në burg; as të bëjë punën e gjykatave të tjera në vend. Në Gjykatën Kushtetuese pra, flitet për gjykim kushtetues me dy objekte: kushtetushmërinë e normave, pra jo akteve individuale dhe mosmarrëveshjet ndërmjet pushteteve.

Kaq sa ka vendosur ka bërë shumë, po të kemi në konsideratë se kërkesa ka qenë vetëm për ligjin e konçensionit (Ligji “Fusha”).

Në fund e përsëris: prisni vendimin e zbardhur. Lerini deklaratat delirante që dalin nga goja e tharë nga sikleti.

Ky është fiks rasti ku dardha e ka bishtin pas!

©Ylli Manjani