Dy këngë malli - Nga Vangjush Ziko
* * *
Mes absurdit të jetës së përditshme
zgjohem me një mendim
të çuditshëm.
Me një hamendje.
Me një dilemë.
Dallgët e shpiritit ato m'i ngrenë.
E braktisa atdheun
a e mora me vete.
I shtriva kufijtë e atdheut mbi detet,
pa prekur kufijtë e shenjta të shteteve.
Kufijtë e shpirtit tim u zgjeruan.
Atdheu zgjohet
dhe fle me mua.
Mes absurdit
dhe jetës së përditshme
fle dhe më zgjon
kjo ëndërr e çuditshme.
* * *
Erdha të puth një prag,
t'i marr erë një trëndafili,
të ec nëpër një sokak
shtruar me petale bliri,
të dëgjoj një këngë
nga një kitarë telakëputur,
takova fëmijërinë
nën sqetull të vetmisë strukur,
pranë saj kish çelur
një lulekuqe alle,
me kupën e saj piva
hashashin e mallit,
rashë në gjumë të trazuar
në djepin e krimbur,
u zgjova i thinjur.
me shpërgënjtë
e mërgimit lidhur.
© Vangjush Ziko