Ode për verën e shkuar - Cikël poetik nga Flurans Ilia

Pëlhurë

Buka e thekur si zgjimi i blirit

bulkthat në jug zbusin kthetrën

lugat i ngujuar në muzg

gjer në zverk zvarrisin zefirin

imazh zafir prej kafeje të fortë

në xhezve të bronxtë

gjurmët mbi rërën e shkrifët

lëçisin filxhanin

Bunaca e Gushtit ç’vesh

gjuhën e konstelacionit

gjumi i galaktikave gllabëruar

si një ballamar i kruajtur

me dhëmbë nga Ballabani

Kështu mëtohet nisja, këmbëzbathur

Ball këtij muri të vjetër përpirë detit

Përtej gjumit të galaktikave fle

Madhërishëm gjiri i Rodonit

Si çdo gji Hyu mbart në gji

Praninë e zehfirit mbi trup të hyjnisë

A thua se po shkel një sarkofag?

Aty ku busulla kapton kuptimin

te kjo liburnë e mbytur në det

humbet me fushqet

duke kërkuar 8-këmbëshin e fjalës

që duhet plandosur 40 herë mbi gurë

duke i lëshuar tendinat e varur jargët

si një kërmill nën hënën e gushtit

ku nata nis e bëhet pëlhurë

 

Dita e Blumit

në kohë të ndryshme

ne nuk jemi i njëjti lexues

i të njëjtën orë

këtu e 24 metafora më parë

si do të ishin jetët tona pa praninë

e zogut të ëmbël të paradoksit?

Aty janë të lidhura të gjitha foljet

për ata që duan folinë

folenë. Ky vend arktik

prania e njeriut përngjan si çudi

midis bishave dhe brigjeve

çast dilemë vramendje violonçel

borë e pashkelur fleta e bardhë

të gjithë jemi qiraxhinj mbi këtë tokë

me një kile «të ardhme»

në trastën e ushqimeve

zverku i njeriut dhe putra e zgjimit

gështenja midis bishës dhe shikimit

romeopatisë dhe tragjedisë

lind papritur një histori

nga ato me dedektivë dhe arratisje

me shërrrr dhe kafshime

me puthje të avullta afshime

me ndukje me penetrime

Të urrej dhe të dua

I hate you and I love you

era e veriut me njerëz të mërkurash

kur mërkuri bie

dita më e vetmuar e të gjitha ditëve

e mërkura si ishull as andej as këndej

as në fillim as fund as e hënë as e premte

as ngrohtë as ftohtë temperaturë zero

Për një të vetme ditë si kjo Gjithkush

Duhet të mbartë brenda vetes

Pak Irlandë

 

Ode për verën e shkuar

Vera mbretëron

të gjitha përvojat poetike të gjakut

terapi e gjatë e qytetërimeve

trupi i dimrit tashmë zgjatuar sa mështekna bri

kapitullit të një gjetheje në rënien e ditëve

zgjatim i natës si brymë mbi kapilarë

temperatura bëhen varkë mbi pellgje të vakët

përrenjtë kërrejnë oksigjenin e syve

mbarsur me një birrë çeke

Ca foto të hershme kur zbulove Amerikën

nga fundi i shekullit të shkuar

në gjurmët e gjumit të humbur.

 

Xhota

Hapësirë midis dy notave

Kjo luginë e heshtur ku rrjedh lumi

Më kujton Xhotën, shef-orkestre

Dirigjent virtuoz e njeri babaxhan

Kur një kordë dilte prej ngastre

I kthehej korit të zërave - Hajvanë!

“Mos më qini veshin”

Mos më qini veshin

Këtë ditë dhjetori pse m’u kujtua

Me sy kujtimesh, sërish Xhota?

Ftohet qiellza fellë zgafellës sime

“Flurans, mos i kthe shpinën lumit”

Nën pardesynë e zërave

Partiturë e borës dhe gjumit

Midis dy malesh zgjatohet ky lug

Jaka e strëngur e pardesysë

Puhizë pëshpërima e zërit të Xhotës

Rizgjon kadencën e pritshmërisë

Kohët muzikore dhe shkopin i tij të artë

“Zëri yt Flurans është bërë

për të mbërritur gjer këtu

asnjë oktavë më lart”

 

Arrati me stil bretkosë

ëndërr e të njëjtës ëndërr

varur vullneti në valle

përpjekje për një pikëpyetje

në këtë botë me halle

Tash nuk ke pse qahesh më

I mblodhe ditët për ditën me D.

mbi re me “stil bretkosë” shtrihet

liqeni midis dy mjellmash

kjo gjendje e paqme fizike

trajta e lëndës dhe forca e fërkimit

PLUSKIMI

Tani nuk ke pse qahesh më

mbledh ditën për ditët me D.

Arratia e një pulëbardhe

nga shkronjat e viteve tetëdhjetë

me "stil bretkosë” mbi një telajo vaji

2020, liqeni shtrihet te pikturat e para

PO ATY

kur kullonin pemët dhe rrënjët

ngelen te ngjyrat fillestare

Tashti ai nuk qahet më

mbledh ditë për ditë një D.

ëndërrat bëhet armë memece

komerdare zisi - bukëpeshku e vjedhur

ndryshe shkumë - deti shpirttrazuar

tallaz përfund te kjo arrati në ajrí

bëhet ajo tokë e brishtë të cilës i tha,

Tash nuk ke pse të qahesh më

I mblodhëm ditët për ditën me D.

©Flurans Ilia

Dhjetor 2020