Minjtë shtegtarë - Nga Heinrich Heine
Shqipëroi nga gjermanishtja Enver Robelli
Minjtë janë dy soj:
Të uriturit dhe të ngopurit me përvojë.
Të ngopurit në shtëpi qëndrojnë,
Të uriturit shtegtojnë.
Mijëra milje udhëtojnë,
Pa prehje e pushim vrapojnë
Drejt me vrapin e tyre të zemëruar,
As era, as moti s’ka për t’i frenuar.
Ngjiten hareshëm në lartësi,
Notojnë gëzueshëm në liqene varg e vijë;
Ndonjëri prej tyre fundoset ose thyen qafën krejt,
Të gjallët lënë prapa të vdekurit shpejt.
Këta huta të vërtetë
I kanë madje mustaqet përpjetë;
Kokat i kanë të rruara,
Krejt radikale, të qëruara.
Bandat radikale sot
Nuk dinë gjë për Zot.
Pjellën e vet nuk e pagëzojnë,
Minushat të gjithëve u takojnë.
Kopeja e minjve epshorë,
Dëshiron vetëm të gllabërojë e të pi çast e orë,
Derisa pi e babëzit ajo nuk mendon,
Se shpirti ynë është i pavdekshëm, nuk mbaron.
Aq e egër kjo kunadhe,
S’i frikësohet maces, skëterrës së madhe;
Nuk ka pronë, nuk ka para për bé
Dhe botën dëshiron përsëri ta ndajë për pe.
Minjtë shtegtarë, o trishtim!
Ata janë këtu, në afrim.
Ata po afrohen, tashmë e dëgjoj buçimën -
Një legjion që s’e ka ndërruar qimen.
O trishtim! Ne e patëm
Ata erdhën para portave zaten!
Prefekti dhe senati bitevi,
Tundin kokat, s’e dinë ç’të bëjnë tani.
Qytetaria armët rrok
Priftërinjtë u bien kambanave tok,
Idhulli i shtetit të moralshëm
Dhe pasuria janë në rrezik të pafalshëm.
As tinguj kambanash, as lutje faltarësh,
As dekrete të mençura senatorësh,
Por, as topa, as gjyle pambarim
Juve, fëmijë të dashur, nuk u ndihmojnë sot asnjë grimë!
Sot nuk u ndihmojnë as gjerdanët e fjalisë
Të shkëputura nga arti i gojëtarisë.
Nuk zihen minj me silogjizma,
Ata kërcejnë edhe mbi të bukurat sofizma.
Në barkun e uritur gjejnë vend
Sall logjika e supës me pure patatesh dhe asnjë send,
Sall argumentet e biftekëve të viçit
Shoqëruar me citate për suxhukun e Göttingenit - larg hiçit.
Një merluc i heshtur, në gjalpë i zier
Do ta kënaq banditin radikal, të urryer
Më shumë se Mirabeau*
Dhe të gjithë gojëtarët që nga Cicero**.
* Mirabeau, poet francez (1749-1791).
** Cicero, poet, gojëtar dhe politikan romak.