Kaligula emëron kalin për udhëheqës Senati - Nga Ndue Ukaj

Dhe arsyetimin e lexon në prani të ligjvënësve kryeulur

Incitatusi im i dashur emërohet udhëheqës Senati

thotë

dhe shikon në mos ndonjëri turfullon

që t’ua hedhë ushqim peshkaqenëve

Dhe vazhdon të tregojë

se ai është më i dashuri mes banorëve të qytetit 

se është i heshtur si vetë heshtja

se ka pranuar nënshtrimin

se do të shërbejë përherë si një kalë

se lexon vetëm çka i jep lartmadhëria

dhe përtypet fshehurazi, sa herë ndien uri 

Dhe emërimi i kalit për udhëheqës Senati

nuk ka shqetësuar njeri

Dikush megjithatë qesh tinëz me kalin Incitatus

të tjerët ia ledhatojnë krifën 

dhe gëzohen se kali nuk vret si perandori

Gëzohen sa herë e shohin të qetë e që nuk shkelmon

Por kur hedh shkelma mbajnë gojën mbyllur

dhe njollat e gjakut i pastrojnë shpejt

Dikush kalëron mbi samarin e tij

se ashtu dyert e Senatit hapen me lehtësi

Të zemëruarit jashtë nuk e ndiejnë duhmën e trishtimit

hungërimat e kalit dhe jashtëqitjet e tij

Vetëm rojet e Kaligulës ndihen të gëzuar

se njëri pas tjetrit

hipin mbi të dhe futen në shtratin e gruas së tij

Kali kur hyn në Senat hungërin

dhe senatorët duartrokasin kur ia shohin dhëmbët

Po qesh kali, thonë dhe qeshin me të

Kali nuk flet asnjë fjalë të rrezikshme

se veç prania e tij është rrezik

Ai e ka mësuar prej të zotit shtypjen

dhe kryen detyrat prej kali me përpikmëri

Tash plot budallenj kalëron ai

Ata që mblidhen në mëngjes në oborrin e perandorit

dhe shohin se si po bie Roma dhe qyteti ynë

dhe nuk bëzajnë

Kështu shkruhen kronikat për rënien

dhe trashëgiminë e keqe të qytetit.

© Ndue Ukaj