Mirëmëngjesi - Nga Ndue Ukaj

ju që jeni zgjuar prej shtratit me ëndrra

dhe e nisni ditën plot ëndrra

ju që prisni t’ju shfaqet një engjëll mëshirëplotë

dhe t’jua dëftojë një kopsht me ëndrra

ju që nuk besoni në ëndrra

dhe jetoni në zhgjëndrra të qelbura

mirëmëngjesi ju që pini kafen e vetmisë

në taverna ndanë sheshit

ju që jeni në një kafene të stërmbushur me zhurmë

dhe nuk e ndieni shijen e mëngjesit

ju që jeni gatuar nga duart e dikujt

dhe ecni të trullosur nëpër udhët e të tjerëve

ju që jetoni në kopshtin e ëndrrave tuaja

apo në shtrëngatën e dashurisë

mirëmëngjesi edhe ju që jeni në gjumë

dhe i lini mëngjeset të treten pa i parë

ju që lehtësisht futeni në ëndrrat e të tjerëve

dhe ecni me peshën e tyre mbi supet tuaja

mirëmëngjesi ju që nuk prisni t’ju mbërthejë nata

pa ju thënë kush mirëmëngjes

© Ndue Ukaj (Nga vëllimi poetik “Mund të jetë si në fillimet e kohëve”, Onufri - 2025)