Vangjush Ziko: Enigma e hijes sime

Nuk e di sa herë ka lindur

sa herë ka perënduar dielli

në jetën time

(lind e perëndon si ëndërr)

gdhihem mëngjesit me ëndje

papritur fshihet pas reve

stuhia vetëtin

shkrepëtin

kthjellet

ndez cigaren

në ylberin lara-lara

(mbledh veten)

dielli perëndon e lind

duke ma hequr zvarrë

hijen

(jetën

që digjet

dhe vetëm digjet)

hiri i saj

plehron

kujtimet.