Alban Bala: Sa shumë yje ranë sonte!

Sa shumë yje ranë sonte!

I numërova të gjitha rrahjet e humbura të zemrës

Hijet e gishtave mbi tryezë janë gjithnjë e më të thyeshme

Për të të prekur...

 

Kam zgjedhur t'i iki gjumit, ëndrrave

Me qiellin flas me morse polare

I bindur se jam një shkëndijë e mbetur

Nga një yll i shuar para se ti të njihje zjarrin

Para se të shkëlqeje në ethen kozmike

Të dritës, magjisë qiellore, mallit...

 

Syte e mi janë dy kasolle që digjen

Në majë të malit...

 

Tash nata po bie mbi gjunjët e detit

Në brigje të epshëm dallgesh

Unë numëroj rrahjet e zemrës që heshtin

Dhe diejt që fiken si fjalë...