Nuk e gjej vendlindjen-Nga Mirela Papuçiu

Jetoj në të njëjtin qytet ku majësqepi

lejlekët më sollën në 75-ën.

Iki ndonjëherë, kur më merr malli

për bukën e ngrohtë të vendeve të tjera

dhe për atë që nuk do të jem kurrë.

Kthehem gjithmonë,

por vendlindjen e kam humbur

para dy dekadash, pak a shumë.

Vetja ime e brendshme tani duhet t' ia dalë

me një përmasë përkatësie mangut

E kam fjalën për shoqen time të ngushtë,

fjongo rinie që mbështolli retë e një qielli tjetër.

Si kanellë e mjaltë për grykët e ftohura,

të qeshurat tona pa shkak,

barna të mira që sot vendos

mbi kujtesën ende të vrarë

se këtë jetë do ta jetokam pa të,

me ç' duket, deri në fund.

Dhe fundin unë e di.

Se ç'quhet tjetër kur humb vendlindjen?