Letërsi

Kartolinë - Nga Alfons Zeneli

Gëzuar vetëm për sot,

gotat t’i trokasim fort

të thyhen si sy mbi tryezën plot

ani se nesër nuk do shohim dot

 

Gëzuar unë ty e ti mua

harrimi na qoftë i harruar

të vdesim për fjalët që s’më thua

dhe Biblën që kurrë s'u mësua.

 

Gëzuar ty pemë dhe vetvetes

buzëqeshje e thyer kur prehesh

në verën që pi fatin dehës

të shkruar mbi hirin e heshtjes.

 

Gëzuar, të pijmë, të pikellojmë

mbi të zezat zeher që na thonë,

mbi mëkatet në natën e vonë

kur ngjizet prore e vërteta jonë.

 

Gëzuar nën dritën e heshtur

të festojmë për këngën e tretur,

me fund ta pijmë ç’ka ka mbetur

mbi varrin e vitit të vdekur.

 

©Alfons Zeneli