Të kthehesh në atdhe - Nga Kliton Nesturi

Të kthehesh në atdhe, pas një kohe të gjatë,

është si të kthehesh në një vend të panjohur.

Askush s’të pret krahëhapur, si dikur,

Të gjithë kujtohen për ty, veç një çast.

Të kthehesh në atdhe, aty prej nga ke ikur dikur,

do të thotë t’ia nisësh çdo gjëje nga e para,

do të thotë të jesh më indiferent

se indiferenca,

më i fortë se poshtërsia dhe më tinzar se lajkatarët.

Të kthehesh në atdhe, aty ku dikur je ndjerë Zot,

Do të thotë të takosh më pak miq dhe veten diku.

Do të thotë të jetosh si vigan i paepur

Mbi gërmadhat e së shkuarës dhe

njerëzit-gërmadha që ndesh kudo.

Të kthehesh në atdhe, për të cilin

ke kënduar dikur,

do të thotë të ndjesh veten

tek gëzon dhe qan,

do të thotë të flakësh ëndrrat dhe

të jetosh realitetin

pavarësisht se shumë gjëra

nuk të pëlqejnë.

Të kthehesh në atdhe, një kohë pas ikjes,

Sheh politikanët që si kurvat luajnë me virtytin

e pasurohen vazhdimisht si të jenë zot të gjithkujt.

Atëherë, shan e mallkon veten që dikur

Nuk pranove të bëheshe politikan.

Të kthehesh në atdhe, pas një kohe të gjatë,

Do të thotë fatin ta marrësh në duar

Dhe ta drejtosh në udhën e vërtetë, të jetës.

Nëse jo, s’të mbetet tjetër veç ta pështysh në fytyrë.

©Kliton Nesturi