Lepuri tregon trimëri - Fabul nga Vangjush Saro

 Vangjush Saro - Vancouver

Kur ra çiftja e parë në korije

dhe u dëgjua që tutje Zagari,

ia dha vrapit Lepuri siç i ka hije

iku nga sytë këmbët i pari…

“Fshihuni, shpejt, po vijnë ata!”

Bërtiste e çirrej ai i ndërkryer.

Pas tij, ia mbathën gjithë kafshët radhë,

kush mundej të shpëtonte kryet.

Pas disa kohësh, këdo takonte,

ia thoshte ndryshe historinë:

“Që thoni ju, është qetë sonte,

Atë ditë ta shihnit trimërinë.”

Dhe diku gjetkë më me fantazi:

“Unë kisha dalë për një shëtitje,

kur befas dëgjoj ca breshëri.

Iu thashë gjahtarëve:

“Mos bëni qitje!”

■

Kështu gjersa dikur fundi ia behu.

Si gjithnjë, po "vizatonte" trimërinë,

kur një Dhelpër për zverku e mbërtheu:

“E vazhdojm’ në strofkën time historinë?…”

©Vangjush Saro