Shëndet

Rëndësia e Probiotikëve dhe Prebiotikëve në shëndetin tonë 

 

Fitnete Bitri/Nutricioniste-Toronto

Çfarë janë Probiotikët (bakteriet e mira)?

Probiotikët janë bakteret e gjalla, të shëndetshme që jetojnë në pjesë të ndryshme të trupit të njeriut, ku një pjesë e mirë e tyre janë përqëndruar në pjesën e zorrëve. Probiotikët kanë përfitime të shumëfishta përsa i përket shëndetit tonë. Bakteret e mira ose Probiotikët ju mbajnë të shëndetshëm duke mbështetur sistemin imunitar po ashtu në disa raste ndihmojnë edhe në kontrollin e inflamacionit në trup. Ato i gjejmë në kos, produkte të qumështit, apo edhe në ushqime të fermentuara si lakra turshi apo kastravecët turshi. Probiotikët janë bakterie të gjalla dhe duhet të kenë ambientin e përshtatshëm për të jetuar dhe për të kryer funksionin e tyre.

Disa nga përfitimet që marrim nga Probiotikët

  • Forcojnë murin e zorrëve
  • Përmirësojnë tretjen
  • Ndihmojnë në zvogëlimin e kapsllëkut
  • Ulin inflamacionin
  • Përmirësojnë përthithjen e mineraleve
  • Ndihmojnë në rregullimin e prodhimit të hormoneve, të cilat kanë një sërë përfitimesh thelbësore në organizëm.

Përdorimi i probiotikëve në formë supplementi është gjithmonë i nevojshëm pas përdorimit të antibiotikëve, përsëritjes së IBS-it (Sindroma e zorrës se irrituar), infeksione të zorrëve siç janë "C. dificile” ose çdo situatë kur sistemi imunitar rrezikohet. Probiotikët nuk jane aq të domosdoshëm për mirmbajtje të përditshme në formë supplementi për një individ të shëndetshëm siç mund të jenë prebiotikët. Mjafton që të përdoren ushqime të fermentuara, apo kosi për të siguruar një dozë të mire të probiotikëve nëpërmjet ushqimit.

Probiotikët te ushqimet e fermentuara

Ushqimet e fermentuara kanë qenë përdorur që në lashtësi dhe vazhdojnë të përdoren edhe në ditët e sotme për shkak të shumë benefiteve që kanë në organizëm. Ata kanë qenë një pjesë shumë e lashtë e dietës. Ushqimet e fermentuara është mirë që të përgatiten me perime që janë rritur në kopësht, pasi ata kanë zhvilluar një marrëdhënie të mrekullueshme simbiotike me një larmi të gjerë të baktereve që gjenden në tokë. Për këtë arsye ushqimet e fermentuara nga këto perime janë një pastrues i fuqishëm i zorrëve, cka bën që qelizat të ushqehen mirë dhe pa toksina për të jetuar mirë dhe për të siguruar gjallëri të fortë. Ushqimet e fermentuara plotësojnë të dyja këto nevoja për zorrët. Po ashtu probiotikët i gjejmë edhe në kos, apo produkte të tjera të qumështit, dhe në fermentime të ndryshme.

Prebiotikët

Prebiotikët janë një formë e veçantë e fibrave dietike të pranishme në bimë - kryesisht ato gjenden në perime. Fibrat prebiotike i gjejmë ne sasi të larta në rrënjët e çikores, agavës dhe luleradhiqes. Po ashtu ato mund t’i gjejmë në shumë fruta dhe perime, të tilla si lëkura e mollëve, bananeve, qepëve, hudhrave, angjinarja e Jeruzalemit, asparagus, fasule, grurë, thekër, elb, presh dhe lakra të egra. Prebiotikët nuk janë organizma të gjallë, prebiotikët janë lënde ushqyese për këto mikro-organizma duke ndihmuar zhvillimin e tyre në aparatin tonë tretës. Duke përfshirë rregullisht këto ushqime në dietën e përditshme arrijmë t'i japim aparatit tonë tretës një dorë mjaft të mirë në punën e tij të palodhur.

Rëndësia e Oligofruktozes dhe Inulinës

Oligofruktoza dhe Inulina janë emrat që u janë dhënë fibrave bimore ose siç njihen ndryshe prebiotik. Amerikanët e Veriut marrin vetëm rreth 2 gram/ditë të këtyre fibrave-70% nga gruri dhe 20% nga qepët. Evropianët hanë tre herë këtë sasi. Sasia e rekomanduar ditore e fibrave është rreth 25 gram në ditë. Industritë tona ushqimore dhe metodat e përpunimit janë duke anashkaluar shumë nga këto fibra që kanë një efekt të mrekullueshëm në funksionimin e organizmit të njeriut. Prebiotikët veprojnë si një “pleh” i pasur që futet në trup përmes furnizimit tonë ushqimor duke zgjedhur të pasurojë vetëm bakteret e mira në zorrë. Ushqimi që hanë probiotikët janë Prebiotiket ose e njohur si FOS — Fructooliogossacharide dhe Inulin. Burimet do të ishin fibrat e tretshme ose plotësuese. Prebiotikët mund të shërbejnë për të dyfishuar numrin e baktereve të mira brenda 20 minutave.

Referenca: "Nutritional Symptomatology"/ Lynne Hinton, BSc, BEd, RROHP, CHCP-Tracy Mc Burney, B.A., RNCP.