Blog

Ish-profesori lypës në London dhe kufijtë e Kosovës - Nga Fazli Mazreku

Nga: Fazli Mazreku

Ngjarje e jetuar

Këtë të premte në London dolëm për shopping, siç e kemi për qejf me thënë ne imigrantet e natyralizuar. Ishte mesdite, piku i trafikut dhe si zakonisht në këtë kohë, pritjet në kryqëzimet e qytetit, në dritë të kuqe, mund të zgjasin edhe deri në dhjetë minuta. Rigonte shi dhe ishte mot i ngrohtë si në pranverën e hershme.

Papritmas, na u afrua tek dritarja e automjetit një njeri i panjohur me një copë letër të grisur nga paketa e cigareve ku shkruhej: “Jam pa strehë dhe më duhet ndihmë”. Bashkëshortja më "urdhëroi" të hap dritaren dhe pa një, pa dy, si gjithmonë, i dha një kartmonedhë personit që lypte ndihmë.

Lypësi (edhe pse ka shumë rrallë në qytet) kur u afrua te dritarja e pa flamurin e Kosovës na pyeti: “Oh! Ju jeni nga Kosova?”

Bashkëshortja pa më dhënë mundësinë që të pegjigjem tha: “Po, nga Kosova jemi.”

Lypësi duke menduar se do të ndihemi më mirë vazhdoi: “Hvala!”

Bashkëshortja ime me nxitim ia ktheu: “Ka falemnderit në Kosovë e jo hvala!”

Lypësi u ndie shumë keq dhe menjëherë pyeti se si e thoni në Kosovë.

Ne të dy, që të ndiheshim sa më patriotë folëm në sinkron: “Ju falemnderit duhet të thoni!”

Lypësi u përgjigj: “Falemnderit, falemnderit!”

Meqenëse karvani i automjeteve nuk po levizte ne vazhduam bisedën.

Bashkëshortja vazhdoi me pyetjen: “A mos keni prejardhje evropiane?”

Lypësi u përgjigj: “Jo, jam lindur e rritur në Kanada.”

Dhe vazhdoi: “Me falni për gafën e bërë pa qëllim! Unë me sa di, harta e re politike e botës akoma nuk i ka ravijëzuar kufijtë shtetërorë të Kosovës!”

Unë, duke parë se bashkëshortja nuk ka pyetje tjetër iu drejtova lypësit: “Si e dini këtë?”

Lypësi u përgjigj: “Unë jam një ish-profesor i dështuar që e dua këtë mënyrë jetese!”

Ne, duke mbetur të stepur me bisedën e “profesorit të dështuar” (!?) u përshendetëm me të. Ai vazhdoi punën e tij me të tjerë njerëz dhe ne vazhduam vozitjen duke u zhytur në zhurmën dhe tymin e automjeteve…