A duhen të tërhiqen subjektet politike shqiptare nga koalicioni qeveritar në Mal të Zi? - Nga Xheladin Zeneli

Të mërkurën, më 27 Mars 2024 në Komisionin e Asamblesë Parlamentare të Këshillit të Europës për Politikën dhe Demokracinë, është aprovuar raporti i cili rekomandon dhe njëkohësisht i hap rrugën anëtarësimit të Kosovës në Këshillin e Evropës. Raporti u votua me 31 vota pro, 4 kundër dhe 1 abstenim.

Në befasi të askujt, kundër këtij raporti votuan dy përfaqësues të Serbisë, përfaqësuesi i Bosnjë e Hercegovinës dhe i Malit të Zi. Me vendimin e tyre, Serbia përmes Aleksander Vuçiçit dhe Bosnje Hercegovina përmes presidentit të Republikës Serbe, Milorad Dodik, arritën të ndikojnë që edhe përfaqësuesi i Malit të Zi t’i bashkangjitet vendimit të tyre kundër Kosovës.

Që nga formimi i qeverisë së re të Malit të Zi në tetor të vitit 2023, qeveri kjo e dalë nga zgjedhjet parlamentare të muajit qershor të të njëjtit vit, me të drejtë është folur shumë për elementët proserbë dhe prorusë që ishin bërë pjesë përbërëse e këtij pushteti.

Pjesë e koalicionit aktual të qeverisë së Malit të Zi janë edhe dy subjektet politike shqiptare: koalicioni “Forumi Shqiptar” dhe koalicioni “Aleanca Shqiptare”.

Ishte pra prezenca e këtyre elementëve proserbe me sentimentin anti-Kosovë që me rastin e formimit të qeverisë së re nxiti reagime dhe shqetësime në opinionin shqiptar lidhur me pjesëmarrjen e këtyre dy subjekteve politike shqiptare në këte qeveri.

Shqetësimet e atëhershme u dëshmuan si të vërteta me votimin e përfaqësuesit të Malit të Zi kundër raportit i cili i jep Kosovës dritën e gjelbërt në rrugën drejt anëtarësimit të saj në Këshillin e Europës, ditën e mërkurë, me 27 Mars 2024.

Të mos përmendim këtu edhe vizitën që pak kohë më parë, Milorad Dodik i bëri kryetarit të Kuvendit të Malit të Zi, Andrija Mandiç, në Podgoricë.

Rikujtojmë se në marrëveshjen e koalicionit qeverisës, e arritur me rastin e formimit të qeverisë në tetor të vitit të kaluar, pjesë e së cilës janë edhe dy subjektet e lartpërmenduara politike shqiptare në mes tjerash, thuhet:

“Qeveria do të mbetet e përkushtuar për harmonizimin e plotë me politikën e Jashtme dhe të sigurisë të BE, duke respektuar të gjitha detyrimet dhe marrëveshjet e marra ndërkombëtarisht. Kjo duhet të garantojë se Qeveria nuk do të marrë vendime që do të vënë në pikëpyetje pavarësinë e Kosovës…”.

Shihet qartas që erdhi deri te cenimi i marrëveshjes paraprake në mes të subjekteve politike shqiptare të cilat ndajnë pushtetin me qeverinë aktuale lidhur me mosndryshimin e politikës së Jashtme të Malit të Zi, posaçërisht asaj në raport me Kosovën.

Vertetë që pati reagime deklarative nga disa përfaqësues shqiptarë lidhur me votën “kundër” nga ana e përfaqësuesit të Malit të Zi ndaj hapjes së rrugës për Kosovën në Këshillin e Europës, por a do të kenë efekt këto deklarata në rishqyrtimin e këtij vendimi skandaloz për Malin e Zi, mbetet të shihet.

Por, nga perspektiva e faktorit politik shqiptar mosrespektimi i marrëveshjes duhet të jetë një kërëcnim serioz i besimit të tyre ndaj kësaj qeverie.

Prandaj, unë mendoj se nuk mjaftojnë vetëm deklaratat kritikuese të përfaqësuesve politikë të shqiptarëve ndaj vendimit të përfaqësuesit të Malit të Zi kundër Kosovës, por ata duhen ta konsiderojnë edhe terheqjen nga koalicioni qeveritar me qëllim që t’i dërgohet një mezash i qartë qeverisë së tanishme të këtij shteti se ata, pra subjektet dhe përfaqësuesit politikë të shqiptarëve në Mal të Zi, nuk do të tolerojnë të ketë kthim mrapa kur bëhet fjalë për çështjen e shtetësisë së  Kosovës dhe nuk do të lejojnë në asnjë mënyrë të pengohet integrimi i Kosovës në organizatat euroatlantike.

© Xheladin Zeneli