Pandeli Majko viziton “Shtëpinë Shqiptare” në Hamilton-Ontario

Në Qendrën Komunitare të Shoqatës Shqiptare të Hamiltonit, më 7 mars 2018 qëndroi  për vizitë delegacioni qeveritar nga Republika e Shqipërisë me në krye Ministrin e Shtetit për Diasporën Pandeli Majko, i shoqëruar nga ambasadori shqiptar në Kanada, Ermal Muça. Delegacioni nga Tirana zyrtare u prit nga një grup aktivistësh të shoqatës si dhe kryetari i saj, Refki Sertolli. Ministri Majko, u shpreh i entuziazmuar kur mësoi që Shoqata e Hamiltonit tashmë ka siguruar objektin e saj të blerë me kontributin e anëtarëve si dhe me financim nga të ardhurat e krijuara prej aktiviteteve që organizohen rregullisht. Ai u premtoi drejtuesve të shoqatës mbështetjen e shtetit shqiptar në drejtim të ruajtjes së identitetit kulturor e gjuhësor dhe të dhënies së informacionit te domosdoshëm për diasporën shqiptare në Kanada.

Sipas tij, projekti që ka përpiluar Ministria e Diasporës e Shqipërisë ka për qëllim të  mbështesë  dhe inkurajojë  angazhimin dhe rritjen e kontributit të komuniteteve shqiptare jashtë vendit në  dobi të  zhvillimin të  atdheut, duke krijuar një herazi më  shumë  mundësi për përfshirjen e diasporës në  vendimmarrje. Ideja e fundit nënkupton dhe projektin për përfshirjen e emigranteve në votime.

Shoqata Shqiptare e Hamiltonit është krijuar në vitin 2010 dhe deri tani është e vetmja shoqatë shqiptare në Kanada pronare e objektit të saj komunitar. Rinovimi i ambienteve të asaj që tashmë është pagëzuar si “Shtëpia e Shqiptarëvë” të Hamiltonit, po realizohet me kontribut vullnetar të anëtarëve çdo fundjavë. Inaugurimi pritet të bëhet së shpejti. Kujtojmë që komuniteti shqiptar në Hamilton ka në shumicë shqiptarë nga Kosova, të  cilët u vendosën aty në  kohën e konfliktit të  vitit 1999 dhe krizës që  u pasua me zhvendosjen e mbi 600.000 refugjatëve në  shumicë dërrmuese drejt Shqipërisë. Kjo është dhe arsyeja që Pandeli Majko, kryeministri i atëhershëm që  administroi krizën, mbetet gjithnjë  një  figurë shumë  popullore dhe që gëzon simpatinë  e veçantë  të  shqiptarëve të  Kosovës.

©FlasShqip.ca